Brief Marketing

ما هو شكل الـ Creative Brief ؟


mohamed zekry sales manger
@zekry | تم تعديله 13 Feb. 2020


3 اشكال من ال Creative Brief  لاعلانات التليفزيون و ال billboards ,واعلانات الديجتال ماركتينج 


mohamed zekry sales manger
@zekry | تم تعديله 13 Feb. 2020



في الكرييتف بريف لاعلان تليفزيونى لابد من وجود الآتي:


1- PROJECT TITLE

وهنا بتكتب إسم البراند أو إسم المنتج اللي عايز تعمله إعلان أو حملة دعائية.


2- CLIENT NAME

معلش هنتعبك معانا هتكتب إسم البراند تاني.

3- CONTACT INFO

لا مش هنكتبك إسم البراند تاني مش سيرة هي! بس هتكتب إسمك إنت المرة دي (إيموجي خالد الصاوي) وهتكتب شوية معلومات عنك إنت زي رقم تليفونك / إيميلك / عنوان شركتك مثلًا يعني.

4- BUDGET


الكلمة اللي بتزعلك معلش، بس أصل الميديا برودكشن اللي رايحلها مش هتعملك الإعلان ببلاش! حط البادجت اللي إنت محددها بس الأكيد إنها مش 5000 .. وممكن تقول مصدر البادجت دي منين عشان لو فيه investors معاك بتدعمك ولا حاجة.

5- PROJECT OVERVIEW


وهنا في إيجاز شديد تقول نفس اللي قولته في الفويس نوت بس بكلام منظم ويوضح بالظبط إنت عايز إيه، شوف إنت كنت عايز تختصر البريف فـ نقطة واحدة من أصل 16 نقطة ازاي ي خلبووص!

مثلًا ممكن تقول:


حملة دعائية للإعلان عن إحدى الـ Projects الخاصة بنا، والمسمى بـ .. وهو .. لمعرفة تفاصيل عن البروجكت: (حط لينك الويب أو البيدج).

6- PROJECT OBJECTIVES


وهنا بتكتب أهدافك اللي عايز تطلع بيها من الإعلان ده اذكرها الأول مجرد عناوين وبعدين خليها مُفصلة.

7- MARKETING GUIDELINES


ودي بقي جواها الزبد كلها واللي لو كتبتهم صح هنضمنلك إعلان متفصل ع البريف بتاعك،


- MARKETING MATERIALS


و اللي متقسمة لـ 7 نقاط،


*الـ Copy: بتكتب بالظبط الإسكربت اللي هيتقال جوا الإعلان سواء كان dialogue أو voice over.


*الـ Print Ads و الـ Banners: وده لو هتعمل billboard مثلًا هتكتب فيها حاجة.


*الـ Display ads: لو عرفت تجيب ريفرانس لإعلان شبيه للي في دماغك تبقى خدمتهم خدمة عمر، ونوع الإعلان إيه؟


*الـ Promo pieces: هنا ممكن تطلب تعمل زي teasing campaign / حملة تشويقية قبل الإعلان نفسه.


*الـWebsite والـ Social media: بتحط فيهم لينكات القنوات والمنصات بتاعتك.


8- TARGET AUDIENCE


طبعًا دي لعبتك إنت أدرى واحد بطبيعة عملائك فـ هتحط مواصفاتهم سواء كانوا بيرسونا 1 أو بيرسونا 2 أو 3.


9- CALL TO ACTION


وهنا بقي بتحط المسدج أو الأكشن اللي عايز عميلك ياخدوا بعد ما يتفرج ع الإعلان.


10- CAMPAIGN LOOK AND FEEL


النقطة دي إنت تقريبًا هتوصل بيها طعم الإعلان هيكون إزاي يعني مثلًا عايز الناس تحس بالفخامة لما تتفرج ولا تحس بالنوستالجيا ولا يوصل إحساس بالتحدي ولا إيه؟

11- CAMPAIGN MESSAGE

يعني بتحط السلوجان اللي هيتقال في الآخر، والـ Tone of Voice اللي عايز إعلانك يتكلم بيها.

12- COMPETITIVE ANALYSIS

معلش غششنا شوية معلومات عن منافسينك الله يكرم أصلك.

13- IMAGE REQUIREMENTS

جواها 3 حاجات الـ Graphics و الـ Photography و الـ Multimedia، أول إتنين بتطلب صور معينة تتاخد خلال الإعلان ممكن إنت تستخدمها في السوشال ميديا .. وتالت واحدة بتحط مدة الإعلان كام دقيقة لو فيديو و حجمه قد إيه.


مثلًا:


1 Min Video 1080p

14- SCHEDULE

بتحطلهم ديدلاين يصوروا فيه عشان ميركونكش ع الرف، وكمان بتحط تاريخ لميعاد نشره عشان المونتير ميسرحش وهو بيمنتج.

15- OTHER


دي بقى تضيف فيها أي ملحوظات زي مثلًا هل إنت عايز التصوير يكون داخلي ولا خارجي، أفكارك اللولبية وكده يعني.


16- DATE

وده بتحط فيه ميعاد تسليمك البريف ليهم عشان ميقاوحوش ويقولولك دانت لسه باعته امبارح. المصدر


البرييق الخاص بالمصمم 





Mahammad elsayed Marketer
@Halim | تم تعديله 13 Feb. 2020


البرييف الخاص بحملة اعلانات على شبكة التواصل الاجتماعى 

١- التعريف بالمنتج:


أول حاجة لازم تتكب فى أى بريف هى التعريف بالمنتج هو عبارة عن إيه بيعمل إيه و ده بيبقى تعريف عام بيتقال فيه خصائص المنتج


٢- وعد البراند "The Brand Promise"



و دى نقطة مهمة جدا لإن دى بتمحور طريقة الكلام اللى هيكون بيها الإعلان أو أى وسيلة تانية البراند هيتكلم فيها، مش كل البرندات عندهم Brand Promise و عشان كدة لازم يشتغلوا عليها طيب يعنى إيه Brand Promise ؟


هو الوعد اللى بيوعده البراند لعملائه إنهم هيخدوه كل مرة هيستخدموا المنتج بتاعه يعنى مثلا فودافون بتوعد عملائها إنها هتديهم خدمة قوية بين إيديهم إنما طريقة إستخدامها هيكون راجع ليهم.. يعنى لو تفتكروا زمان لما أطلقوا حملة “القوة بين إيديك” إبتدوها بحملة “هس السلعوة” و اللى كانت بتدور حوالين واحد بيكون فى الصحرا و بتطلعه سلعوة و هو معاه منتجات فودافون و كل مرة بيستخدمها فى حاجة تنقذه من السلعوة.


طيب فى الحملة دى إزاى فودافون بتقول القوة بين إيديك.. أول حاجة المكان “شخص تايه فى الصحرا” يعنى محدش عارف يوصله و دى بتوصل بيها رسالة إنها شبكة مغطية كل الأماكن يعنى متقلقش لو كنت فين و بالتالى دى نقطة القوة اللى موجودة معاك إنت بقى لو حصلتلك مشكلة هتستخدم فودافون و تحلها و تنقذ نفسك.. و لو بصيت هتلاقى كل الإعلانات بتتمحور حوالين الموضوع ده حتى فى إعلان “فيها حاجة حلوة” اللى نزل النهاردة هتلاقى الرسالة اللى المفروض تفهمها إنك لو مايسترو و فرقتك مش موجودة برده هتقدر تعمل حفلة لو معاك فودافون.




٣- هدف الحملة:


و دى من أهم النقط و اللى بتحدد طريقة الإعلان و صياغته يعنى إنت كمعلن ليه عاوز تعمل الحملة دى؟ هل عاوز الناس تعرفك لو إنت منتج جديد؟ و لا عاوز تفكر الناس بيك؟ و لا عندك عرض جديد عاوز تقدمه؟ و متقولش أبدا عاوز أزود المبيعات لإن ده شئ بديهى المهم إنت عاوز تزود المبيعات إزاى، و برده مينفعش تقول عاوز كل ده لإن ساعتها الرسالة مش هتكون واضحة للناس و هتضيع و المبيعات مش هتزيد و لا حاجة.


٤- الجمهور المستهدف:


و فى دى ياريت تدرس الجمهور بتاعك كويس و تكون محدده يعنى متقولش عاوز مصر كلها لا تحدد مين فى مصر و لا عندك كذا جمهور مستهدف ياريت تعمله كذا إعلان و ربط الكلام ده ببعضه شغلانة الوكالة



٥- شخصية المنتج:


و دى فيها لازم تتخيل منتجك لو شخص هيكون عامل إزاى بيتكلم إزاى.. جد و لا بيهرج.. دمه خفيف و لا عادى… بيلبس بدلة و لا كاجوال.. لإن على الأساس ده هتعرف إزاى تعمل الإعلان بتاعك



٦- مميزات المنتج USP:


و دى النقاط البيعية للمنتج بمعنى أنا كمستهلك ليه هشترى المنتج بتاعك مش المنتج المنافس؟ هل عشان الجودة و لا السعر و لا خدمة ما بعد البيع و لا عندى معاك خبرة و لا إيه؟



٧- مين أكبر منافس/منافسين ليك فى السوق


لازم برده تكون عارف حجمك فى السوق و شخصية المنافسين اللى حوالين عشان تعرف تاخد منهم عملاء و تعرف تكون مختلف عنهم



السبع نقاط دول أهم نقط لازم يكونوا واضحين و محددين لما تجى تعمل أى إعلان سواء كنت مدير تسويق أو بتعمل الإعلان نفسه عشان تعرف تقيم الإعلان بطريقة صح بعيدا عن التفضيلات الشخصية و عن طريق الحظ و نعمل حاجة تفرقع و خلاص. المصدر




  مواضيع ذات صلة